Novas sardas de sa chida, settimanale on-line della Fondazione Sardinia, Anno I, n° 25, domenica 10 settembre 2012. Editoriale di Bachisio Bandinu: Sa crise de sos sardos

IN CUSTA CHIDA: rassegna della stampa sarda della settimana.

 

 

 

 

 

 

 

 

 

Editoriale: Sa crise de sos Sardos, di Bachisio Bandinu

 

Est semper crise de disisperu e chene isetu cussa chi rughet supra sos Sardos, d-onzi via paret chi si trattet de vita o de morte. “Nos an lassatu solos, nessune nos ajuat”. In fundu de s’animu b’at unu sentimentu de abbandonu ca nemos si nde dat cura. Est comente chi sa crise, chi puru naschit dae una causa crara, tancare una miniera o una frabbica, s’aggantzet a una crise prus manna, crise istorica de unu populu: soletate e angustia chi venin dae tempos longos. Su disisperu prus nieddu: “Potet sutzedere de totu ca semus disperatos, non semus meres de su chi potet capitare”. Fintzas a su pantasima de sutterramentu, a 373 de profunditate. Interratos vios. S’atteru seperu de isporu est a si nche artziare a supra una turre, a impicare sa vita in chelos de mancamentu e de nieddore. Prontos, a trettu de si nche ghettare. Arrivatos a su puntu de si ‘achere male, de si ‘achere una ‘erta, de si truncare venas, de si secare membru. Menzus mortu! Non b’at disisperu prus mannu de chie si videt mortu essende viu. Si sentit una mancantzia de b’esser in su mundu. Pro sos Sardos sa crise de su travagliu arrivat a essere crise de esistere.

Ma proite s’arrivat a custu puntu? A parte su pesus de s’istoria e sos tempos longos de amargura, custa crise oramai durat dae prus de 40 annos e non dat isperantzia peruna: chimbant’annos morinde chene morrere. Non si nde potet prus de un’agonia  chi non lassat locu mancu a sa morte. Pranghende su fallimentu de industrias irbagliatas e mantesas in rianimatzione. E gai, frabbicas e pessones viven custa pena che unu male netzessariu. A dolu mannu nostru; unu male mannicatore nos destruet  e sa tristura est chi de custu male amus bisontzu pro no morrere. Non nos potimus permittere mancu de morrere.

Ma b’at un’atteru arrejonu de ‘achere. Custu vivere in agonia est formande unu populu de tristura, chene fide, chene ispera e chene amore. Su disisperu chi toccat babbos e fitzos no aperit arveschita, tempus de nieddore nos rughet a supra.

E tando, ite si potet ‘achere? Cumbenit a sichire in custu jocu de morrere chene morrere o si potet provare a cambiare su jocu? Tzertu no est fatzile, ma in 40 annos nessuna politica b’at provatu a progettare atteras attivitates, a cambiare tipu de travagliu e industrias chi no avvelenen aghera, abba e terra. Si devet provare, fintzas in su pacu, si comintzat cun d-unu gradinu pro ‘achere s’iscalinata. Sun tempos de iscuricore ma pro cussu devimus chircare lucore.

Bachis Bandinu