SU MASTRU MANNU DE S’ARCHEOLOGIA EST OE PURU UNA GHIA SEGURA: GIUANNE LILLIU DUOS ANNOS A PUSTIS DE S’ISCUMPÀRFIDA, de Federicu Francioni
Duos annos a pustis: torrat sa chistione de sa responsabilidade de sos intelletuales – La degradazione storica della società barbaricina – Sas istatuas mannas de Monti Prama – Lilliu “militarista” e “maschilista”? – Ammentos de unos cantos cumbènios – Gràtzias dae su profundu de su coro, professore!
Duos annos a pustis: torrat su problema de sa responsabilidade de sos intelletuales. In custu artìculu chèrgio ammentare – a nùmene de sa Fondatzione “Sardinia” – Guanne Lilliu, s’archeòlogu, su professore de s’Universidade de Casteddu, accademico dei Lincei chi nos at lassadu su 19 de freàrgiu de su 2012. Fiat nàschidu su 13 de martu de su 1914.
Devimus pònnere sa biografia de Lilliu in sa pelea de sa Natzione sarda non solu pro sa subravivèntzia sua, ma pro afirmare s’esistèntzia de una pessonalidade istòrica, culturale e linguìstica originale, irripetìbile e, in raportu a issa, pro arribbare a una sugetividade e a una soberania de tipu polìticu e istitutzionale: Lilliu at faeddadu de autodeterminazione. In custu campu est pretzisu fàghere un’àtera cuntierra cun tzertos intelletuales sardos, semper acotados dae sos giornales, semper parados e lestros a negare non solu sa costante resistenziale sarda (tìtulu de un’iscritu famadu de Lilliu), ma calesisiat batàllia – in pro de sa sotziedade nostra, pro un’istratzu, a su mancu, de autonomia - presentada dae custos òmines comente trèmene, un’ispètzie de lacana, proite, issos ant semper naradu, devimus èssere europeos, internatzionalistas: est a nàrrere chi issos ant impitadu s’arma de unu cosmopolitismu pseudoprogressista, pseudoilluminista (s’Illuminismu est cosa sèria, est àtera cosa), indunas, unu universalismu falsu, sena istòria, sena raighinas, sena progetu e duncas sena tempus benidore.
Però unos cantos de custos intelletuales a s’agabbu ant dèpidu reconnòschere s’importàntzia de sa costante chi – comente Lilliu matessi at postu in craru – non cheret tzertu nàrrere irmentigare o cuare sas responsabilidades mannas de sos grupos dirigentes sardos, teracos de sas dominatziones istràngias. Dae custu puntu de bista, in s’evolutzione de su pensieru suo, Lilliu est istadu craru e ladinu: s’istòria nostra, mescamente a pustis de sa conchista colonitzadora de Roma, giughet su signu de s’atividade de sos gai cramados, dae isse, collaborazionisti e matricidi: paràulas terrìbiles, a bi la pensare bene!
La degradazione storica della società barbaricina. Comente chi siat, intelletuales e giornalistas ant sighidu in sas campagnas de imprenta issoro: faeddare de pessonalidade e de identidade de sa Sardigna – cunforma su pàrrere de custos – cheriat nàrrere solu àere in conca paràulas malas e feas, opuru una Barbàgia agropastorale presunta pura e primigenia, chi no est mai esistida: a custu argumentu Lilliu aiat respostu – a bi pensades! – dae sos annos sessanta cun pàginas prenas de riferimentos bibliogràficos (Padre Bresciani, Banfield, Alphonse Dupront, Clara Gallini, Bustianu Dessanay, Luca Pinna, Gonàriu Pinna e àteros) subra de La degradazione storica della società barbaricina. Istamus atentos a su tìtulu matessi: fiat craru dae tando chi Lilliu non teniat su mitu de sa Barbagia, ma aiat unu bisu prus mannu de su cherveddu – minore – de sos crìticos suos.
In su 1968 de fatis isse fiat interbènnidu in unu dibàtidu in ghìriu a La vendetta barbaricina come ordinamento giuridico (1959), s’òbera classica de Antoni Pigliaru, cun una resposta a una tesi de su sotziòlogu Tullio Usai chi in sa revista “Autonomia cronache” – de Mànliu Brigaglia e de Pedru Soddu – aiat iscritu: in Barbagia – si podet e si depet nàrrere – non b’at, propriamente, una sotziedade; issa, de fatis, si podet fundare solu subra relatziones e interessos econòmicos; imbetzes in cuddu territòriu totu custu est postu in crisi dae irrobamentos, fura de bestiàmene, vinditas e cadenas de sambene; est a nàrrere unu non-reconnoschimentu de su printzìpiu de sa propriedade. Una sotziedade – aiat concruidu Usai – non podet esistere solu in sos momentos rituales de “sas paches”.
Lilliu non faghiat unu discursu econòmicu e/o sotziològicu, ma istòricu, èticu e polìticu. Cartaginesos e Romanos aiant iscatzadu dae sas àreas prus ricas de s’ìsula sos Sardos indìgenos, custrintos a si nche fuire e a bìvere in sas montagnas, in riserve indiane, fatende una vida de banduleris, cuasi de remitanos, sena paghe, cun lutas intre sìngulos, grupos e famìllias-clan, cun sa possibilidade de fàghere sas bardanas, tzertu, ma pro torrare a s’agabbu in sa casa-guscio. In cuddane biviant che òmines-boes, òmines-berbeches, òmines-caddos, figuras chi ant semper dadu vida, ànima e fantasia a sos sìmbulos de sas traditziones populares: pensamus a su “boe muliache”, istudiadu dae Lillinu Marchi chi aiat bortadu in una crae – naramus gai – sarda, su chi fiat istadu analigiadu dae s’etnologu Ernesto De Martino in raportu a su Mesudie de Itàlia: est a nàrrere su problema de sa perdita della presenza, de s’identidade umana chi mudat in cudda de sa fera (su pastore “solu che fera” de pigliariana memòria).
Pro totus custos motivos, sa Barbàgia, in cussa conditzione, non podiat fàghere àteru chi «degradarsi. Appunto la prima degradazione della società barbaricina, dobbiamo vederla nei tempi dei due primi grandi urti storici tra Indigeni e Semiti e Romani, quando il mondo barbaricino si impenna e insieme comincia a cadere, pian piano degenerando dall’originaria compattezza». Duncas amus bidu, amus lègidu bene: degradazione, degenerazione sunt sas paràulas impitadas; e custu cheret nàrrere fraigare mitos subra sa Barbagia? Ma tzertos crìticos – prus o mancu cuados – ant lèghidu de aberu sas òberas de Lilliu, su Mastru, su Babbu mannu de sa Natzione sarda?
Dae una situatzione chi fiat arribada – passende atraessu determinados momentos e tzertas bortadas (dae s’Edade antiga a cudda media, dae sa moderna a cudda contemporànea) – fintzas a sa gai cramada recrudescenza del banditismo (cando Lilliu faghiat custu artìculu), si podiat bessire a foras, segundu sa tesi de su Mastru mannu de s’archeologia sarda, solu cun una riforma profunda: issa non depiat falare dae s’artu, non podiat èssere imposta, ma depiat bènnere dae intro de sa sotziedade, dae intro de sa Barbagia matessi, in paris a sa netzessidade de sarvare non solu interessos econòmicos e su diritu a sa propriedade, ma mescamente sos balores beros de sa solidariedade, de s’egualitarismu. Est pretzisu repìtere: cun custas pàginas de Lilliu semus a una cussèntzia garriga de pensamentos, de dolu, de isperàntzia pro sa Barbagia, atesu meda dae su mitu de sa Barbagia matessi.
Tzertu, Lilliu bidiat in su pastore de sa Barbagia unu campione de rebbellia, de una resistèntzia, naramus gai, “montagnina”, ma poniat in lughe puru su individualismo, sa pigrizia (e sunt paràulas suas), sa fura de bestiamene – antiga meda – sa violèntzia intre sos singulos, intre sas famìllias, sa vindita, indunas, totus sos males de su mundu de su pastoriu.
Ma sos crìticos de Lilliu bidu l’ant inue s’agatat Su Nuraxi de Barumini, iscobertu e studiadu dae Lilliu, chi in su 2000 est istadu decraradu dae s’Unesco – nuddamancu! – monumentu de su patrimòniu mundiale de s’umanidade? No est in Barbagia, est in Marmilla (est a un’altesa de m. 202) e duncas Lilliu non fiat tzertu montagninu!
Cando isse iscriet subra de sa costante resistenziale, partit dae s’istòricu frantzesu Fernand Braudel – su chi isse iscriet subra de pòpulos de sos pranos, pòpulos de sa montagna in s’òbera sua Tzivilidades e imperos de su Mediterràneu – est a nàrrere dae su cùcuru mannu de s’istoriografia internatzionale: sos istudiosos chi ant criticadu Lilliu sunt resessidos a fàghere su matessi? Non solu Lilliu at imparadu – e impitadu bene meda! – su gai cramadu metodo stratigrafico, ma est resessidu puru a pònnere s’archeologia in una dimensione istòrica. Su libru suo de su 1977 subra s’istatuas mannas de Monti Prama non pertocat solu a s’archeologia, ma a su dibàtidu istoriogràficu e intelletuale totu intreu.
Sas istatuas mannas de Monti Prama. Lilliu ischiat fàghere autocrìtica cando sa situatzione provocada dae s’irvilupu de sas chircas istòricas e archèologicas lu pediant. In su 1953 aiat crètidu chi dae su fraile de s’artesanu de sa tzivilidade nuràgica non poderent bèssire a foras istatuas mannas, ma sa positzione sua cambiaiat a pustis de su 1974 e isse – cun onestade intelletuale chi est difitzile meda agatare in unos cantos academicos – lu reconnoschiat, non solu, lu disigiaiat comunigare deretu; lu faghiat pro fidelidade, dae una banda a sa lògica issientìfica, dae s’ater’ala a su protzessu de liberatzione de sa terra sua. Isse est semper istadu in cuntierra cun totus sos archeòlogos chi non publicaiant, a pustis de annos e annos, sos resurtados de sas chircas issoro. Custu sutzediat in cara a s’iscoberta de sas istatuas mannas de Monti Prama, a curtzu de Cabras. E pro custu Lilliu comunigaiat: «[…] oggi possiamo affermare che l’isola dei nuraghi lancia la sfida, nella grande plastica, ai potenti paesi egizi, mesopotamici e greci. E dovremmo dunque, se non ribaltare, modificare in senso altamente evolutivo il discorso sulla capacità culturale e il progresso politico-sociale dei sardi nell’età delle grandi colonizzazioni storiche».
Sas istatuas mannas de Monti Prama ammentaiant a s’archeòlogu sas istatueddas e sas fainas de sos sèculos antigos, dae su nonu a su sestu in antis de Cristu. Atintzione: Lilliu si fiat cumbìnchidu deretu d’essere in fruntene a una produtzione de sa tzivilidade nuràgica – isse puru depiat, a su mancu in parte, pònnere in crisi unu paradigma dominante – in su mentres chi àteros istudiosos, cabos de tostòinu de aberu, faeddaiant de periodo punico o a su mancu de determinante influèntzia fenìcia e pùnica.
Lilliu non si firmaiat a su reconnoschimentu de s’originalidade de s’iscoberta, proite su gèniu suo lu giughiat a pensare a «un tempio con le statue. Il recupero di cinque torsi e di due teste, che non ne sembrano far parte, ci offre il numero di sette statue certe nel luogo di Monti Prama. Ma tanti altri frammenti disparati inducono a supporre una quantità ancora maggiore di questi straordinari e stupefacenti simulacri affollati in uno stesso posto. Sa tesi de Lilliu in custu momentu (e a pustis) fiat chi Monti Prama rapresentaiat unu momentu de passàgiu de sa tzivilidade nuràgica dae una monarchia de tipu assolutu a una sotziedade cun «struttura gentilizia che gusta le prime libertà dell’età aristocratica. A parte altre considerazioni, lo stesso sforzo, visibile nelle statue, di dare, se non una vita, un’immagine umana alla rigidezza e alla semplificazione geometrica, rivela un sentimento cresciuto di interessi più larghi e di conoscenze razionali che non erano della vecchia società nuragica, basata su costumi primitivi pervasi di istinto e magismo».
In cuddu momentu determinadu de s’istòria issoro, sos nuràgicos aiant fraigadu a Monti Prama unu tempio pansardo e chircaiant de superare su gai cramadu cantonalismo. Unu resurtadu est seguru: in su VIII-IX sèculu in antis de Cristu – est a nàrrere 400, 500 annos in antis de sos Gregos – sa Sardigna at espressu un’istatuària manna sua (comente at sustènnidu Lilliu) originale e anticlassica. A custu cuntzetu isse est arribbadu dande unu sentidu positivu a su chi in Sardigna podet pàrrere barbaro e selvaggio, ma est giai cumpridu dae unu puntu de bista estetico.
In sos articulos de s’imprenta isulana, a pustis de sa noa de sa morte sua, niunu – o cuasi – at ammentadu Dal “betilo” aniconico alla statuaria nuragica, cumpàrfidu in Tàtari in su 1977: òbera chi at cuntribuidu a abèrrere sa carrela – cumpricada meda – a su restàuru fatu in su fraile de sa Subraintendèntzia de Li Punti (in Tàtari): incuddane sas istatuas de Monti Prama – cun professionalidade e cuntivìgiu mannos de aberu, cun mèdios informaticos sofisticados, pro mèritu mescamente de Antonietta Boninu, de Alba Canu e de àteros – sunt istadas restituidas a su gosu e a s’ammiratzione de sos visitadores, indunas, a dognunu de nois. Ma est longa galu sa caminera chi potat dare balore prenu a custa iscoberta magnìfica e acumpangiare, mescamente sas generatziones noas, a cunsiderare, a defendere cun sas ungras e cun sos dentes, cussu patrimòniu de istòria, arte e cultura: sunt meda sas dificultades e sos ostàculos chi devimus brincare – e non solu in su campu museale – pro arribbare a una rapresentatzione unidària de sa tzivilidade nostra.
Est pretzisu pònnere in craru chi, a custa iscoberta de Lilliu, professorones de Universidade e giornalistas, sena capatzidade peruna de cumprendere custa bortada – chi non pertocat solu su campu archeològicu – respondiant torra: atintzione a non fraigare mitos! Ite devimus faghere como, at iscritu una borta un’istudiosu (in un’artìculu subra de sas istatuas de Monti Prama): compònnere un’innu pro una sotziedade de gherradores? E gai sighinde cun istumbonadas (in italianu: colpo di fucile di grosso calibro, est a nàrrere sparate belle e buone).
Lilliu “militarista” e “maschilista”? Lilliu non s’est postu mai a fraigare mitos, proite sas chircas e sos istudios suos moviant semper dae sas produtziones materiales de sos sardos e sas interpretatziones suas fiant semper articuladas, argumentadas cun lògica rigurosa, sustènnida dae un’iscritura semper frisca, giòvana.
Non tenimus bisòngiu de mitos. Su problema de sa comunidade nostra est lassare dae un’ala sentidos de culpa e de birgòngia, pro dare su balore beru, giustu, a su chi semus resessidos a produire in sos sèculos.
Est istada posta in lughe dae Lilliu s’importàntzia de sas culturas antigas in sas relatziones issoro cun cuddas de su Mediterràneu: in custu cuadru isse bidiat in sa cultura de Othieri (3000-2000 in antis de Cristu) sa capatzidade de reconnòschere, de esprìmere unu rolu importante de sa mama, de sa fèmina: s’origine, sa raighina, forsis – agiunghiat Lilliu – de una traditzione chi podiat giughere fintzas a Maria, sa mama de Gesus. Ma custa presèntzia, s’ispìritu biu de custas comunidades, nàschidu forsis dae unu matriarcadu prus antigu – chi aiat postu sa Sardigna a costàgiu de penìsula anatòlica, àrea egea, Malta, Corsica, terras ibericas e de su Mesudie frantzesu – fiat istadu cantzelladu a pagu a pagu dae su podere de su màsciu, «il capo e il detentore della produzione […] ed anche della distribuzione d’un surplus». Sa presèntzia e su rolu de sos metallos, de su brunzu e de sas armas aiant giutu a unu bisu maschilista – gai iscriet Lilliu – finas in sa religione (bìdere G. Lilliu, La Sardegna nella matrice mediterranea, in Le radici e le ali, a cura di A. Contu, Condaghes, Cagliari, 2009, pp. 57-79, mescamente sa p. 65).
Bene meda, cando Lilliu faeddaiat de maschilismo – in unu sentidu, est craru, negativu – non mustraiat tzertu una mentalidade militarista, comente ant iscritu (o ant atribuidu a isse) espertos e istudiosos in raportu a su bisu chi su Babbu mannu de sa Patria sarda aiat maturadu de sa funtzione de sos nuraghes in sos territòrios.
Unu libru at istudiadu su rolu de sa femina, fatende riferimentu a sas òberas de Ettore Pais, Giovanni Pinza, Antonio Taramelli, Christian Zervos e mescamente a Lilliu. Su cuntzetu de matriarcato est refudadu, tzertu, però bessit a foras chi sas feminas nuragicas – a su mancu cuddas chi aparteniant a sos grados prus altos de s’iscala sotziale - podiant gosare de una tzerta autonomia (bìdere su libru, interessante meda, de Elisabetta Alba, La donna nuragica. Studio della bronzistica figurata, Carocci, Roma, 2005).
Lilliu teniat cussèntzia prena de s’importàntzia de sa religione in sa sotziedade nuràgica, inue bi fiant non solu gherradores, comente mustrant istatuas mannas e minores, ma puru pastores, artesanos, fèminas e òmines impignados a traballare sa terra, pro un’iscàmbiu cun sa natura, pro mantènnere in vida sos grupos umanos, cosa chi – a sa sola – sa religione non podiat, non podet tzertu fàghere o assegurare.
In artìculos e in libros subra de s’archeoastronomia, in pro o contra de sa Sardigna che Atlantide, si podet bìdere s’istresiamentu de unos cantos autores dae Lilliu, s’istudiu, s’impignu issoro – cuasi – pro non lu ammentare, pro no inditare Dal betilo aniconico alla statuaria nuragica, una bortada bera, fundamentale, non solu, amus a repitere, pro s’archeologia, ma pro s’istoriografia. “La Nuova Sardegna” est resessida a fàghere dae pagu un’insertu subra Monti Prama inue nùmene e sambenau suo non cumparrent mai!
Ammentos de unos cantos addòvios e cumbènios. Disigiamus ammentare chi isse – in sos annos dae su 1998 a su 2002 – aiat respostu cun piaghere e cun modestia a s’invitu fatu dae sa Consulta intercomunale de sa limba sarda (chi cumprendet rapresentantes de Tàtari, Portu Turre, Sossu, Sènnaru, Stintino), Sòtziu de sos sardos (editore, in paris a Condaghes de Frantziscu Cheratzu, de sa revista “Camineras”), Fondatzione “Sardinia” de Bachis Bandinu e Sarvadore Cubeddu, cun àteros sotzios, ammanigiadores in Tàtari Mannu de cumbènios pro “Sa die de sa Sardigna”: cun espertos e professores, sos istudiantes si cunfrontaiant dogni borta subra temas diferentes. Chèrgio ammentare mescamente, intre custos, su cumbèniu “Maschile / Femminile nella storia e nella cultura della Sardegna e del Mediterraneo”: tando Lilliu no aiat tzertu fatu una relata subra de sa gloria de sa tzivilidade nuràgica in crae militarista, ma aiat faeddadu pròpriu de una sostziedade maschilista chi fiat bennida a pustis de cudda de sa Dea mama.
Comente chi siat, cun sa presèntzia calificante sua a custu e a àteros addòvios, Lilliu aiat respostu a sa campagna de imprenta iscadenada dae Costantino Cossu e dae àteros subra de “La Nuova Sardegna” contra sas manifestatziones pro “Sa die”.
Lilliu fiat istadu galu cun nois pro una relata bella meda a su cumbeniu tataresu subra Antoni Simon Mossa (abrile 2003). Aiat rispostu a s’invitu e si fiat postu in biàgiu dae Casteddu pigande in su trenu a sa sola: fiat galu giòvanu in s’ispiritu, semper mòvidu dae sa boluntade de aiscurtare e agiuare, una virtude chi est pròpria de sos Mastros mannos, de sos chi non podimus e devimus irmentigare.
Gràtzias dae su profundu de su coro, professore! Gràtzias de aberu, professore, pro totu custu chi nos as donadu. Cando est bennida sa noa de sa morte tua, nos semus postos a prànghere. E semus prus pòveros a pustis de s’iscumpàrfida, ma prus ricos pro sas iscobertas tuas – richesas materiales beras – e pro s’eredidade ispirituale chi tue nos as lassadu. Pro nois sighis a èssere una ghia segura!
S’autore de custu artìculu at chircadu de impreare – su prus possìbile – sa Limba Sarda Comuna.
