Su Re e nois, de Nicolò Migheli
Su Re de Giovanni Columbu l’apo idu, at a èssere, duas chidas a oe. E solu como che resesso a nd’iscrier. Tenet resone Salvatore Cubeddu cando narat chi cussu film ti leat s’alidu, pro cantu est forte. Fortes sunt sas caras de sos atores, sas rocas tribuladas de su Corrasi, su limbazu barbarighinu e sas nues buiosas chi che iscurigant sa die. E forte est su contu. Una fortilesa chi ti leat su coro, chi faeddat deretu a sas intragnas. E no podet èssere diferente ca est unu film chi tenet peraulas pro totus. Faeddat a cale siat pessone, creat in su Cristos o nono. Est un’obera chi nos pertocat in cantu omines e feminas de oe e de semper, e fintzas in cantu sardos. Su contu de sa passione de su Cristos e de sos suos marturiadores, ch’essit de sa dimensione religiosa, est su contu eternu de sa vitima, de s’innotzente no riconnotu e cundennadu a sa peus pena.
“Il racconto di una comunità assassina” at iscritu Boreddu. Onzi obera cando ch’èssit de manos de chie la faghet, e lompet a ogos de chie la idet, mudat de significu, ca sas miradas no sunt parimighes e onz’unu tenet craes suas pro cumprenner e bi lezere cussu chi ateros no ident.
Una istoria universale ue si podet riconnoscher cale siat comunidade. In custu nos azuat s’antropologia mimetica e René Girard chi n’est s’interprete prus importante. Issu iscriet chi si oe tenimus una sentidu pro sa vitima est ca sa Bibbia prima e Cristos pois, nos ant fatu a cumprenner su bizonzu de sas sotziedades de produer “capri espiatori;” pessonas chi enint incurpadas de onzi malefata, in s’ispera chi cun sa morte issoro che frangat sa cuvisione e torret un’armonia in cumone. Cando una pessone cun fatos e peraulas si che ponet fora de sa medièdade. Cando sa comunidade no atzetat de portare sa responsabilidade de sa disunidade, non nde cheret cumprenner sas resones, agat in sa pessone diferente, in sas ideas e oberas suas, su motivu de sa disunidade e de sas lites. Una erentzia de su Diaulu, iscriet Girard. Diaulu comente su chi portat sa disamistade e sa divisione.
Custa carrela antiga nois sardos la connoschimus bene. Onzi annu pro carrasegare ne torramus a fagher su contu trazicu. Sas caratzas barbarighinas, sos rees Zolzi, su Batileddu, Martisero, ateru non sunt chi “il capro espiatorio” de sas comunidades. Su contu de mortorios festados, ue bi est fintzas sa resurretzione. “Zorzi lassa su piantu, chi torras in Pasca Santa” (Alziator 1956) cantaiant in Bolotana. Ca sa morte rituale cheriat una rinaschida, su sacrifitziu est “sacrum facere.” Una manera pro impedire chi su mortu esserat torradu pro si nde pagare. Traditziones arcaicas cuadas a intro de su mito chi, sigundu Girard Sa Bibbia at postu in campu. Si su mito est su contu de su marturiadore, sa Bibbia e su Cristos, sunt cussu de sa vitima. De tando nemos est prus innotzente, ca amus connotu sa veridade, ca “le cose nascoste fin dalla fondazione del mondo” como sunt craras a totus.
Est Cristos cun su sacrifitziu sou, chi est s’urtimu chi no las at riveladas. Est craru como, proite sa Passione faeddat a totus. Giovanni Columbu, responnende a Boreddu, narat chi in Sardigna abarrat in sas intragnas nostras unu Deus de s’Antigu Testamentu. Pro contu meu est su deus de prima de sa Bibbia, arcaicu, chi cheret su sambene de s’innotzente. In d’onzi manera nois sighimus in su Carrasegare, mancaris no ne tenimus cussentzia, a festare sa morte de s’innotzente.
Creo, ma mi potzo isballiare, chi Giovanni Columbu apat situ peri sas camineras de sas traditziones nostras; chi contare sa Passione siat istadu non solu unu biazu in su Evanzeliu, ma fintzas una manera de narrer de nois sardos; de sas comunidades nostras chi a dies de oe si sentin brivadas de onzi ispera, cun sa zente chi si bortat s’unu a s’atera comente espos a intro de unu bote. Chi si leat sa vida pro disiperu. Mi seo fatu custa idea ca su Re si frimat a sa morte de Cristos, no b’at resurretzione peruna. Podet èssere solu una sebera istilistica. No b’at resurrezione in su film de Columbu, comente parzat chi no si nde idat in sa Sardigna de oe. Cussas nues turmentosas, cussas caras sena piedade, cussas rocas arestes, parent chi nerzant chi non tenimus ispera peruna. E puru no est gasi. Passat su ierru, passat sa die mala, e n’amus a bessire fintzas custa borta. B’at oberas chi sunt su sinzale de su tempus nostru. Su Re de Giovanni Columbu est una de cussas. Una de sas menzus.
