Sa festa e s’arregodanzia de sos sordaos mortos. E de sa vittoria, da-e Diegu Zoccheddu

S’arregodu de unu sordàu sardu de sa Brigata Sassari mortu in gherra:

Oe s’affestant’ e s’arregodanta sos sordaos mortos in gherra. E, comente sordàu mortu in gherra, e “eroe de sa patria italiana,” afestant’a mimi puru. A mimi, chi no seo nemmos, e mancu seo italianu.

No ischidìu mancu itta fud’Italia e inua fudi. Deo fui solu unu pastore sardu, connoschìu solamente sos montes, e sas campagnas solitarias de sa terra nadia; e inoghe, in custas baddes solianas, profumadas de murta , de chessa e de armidda, fui crefiu abarràe, imbezzae,e bivvidi.

Faìu una vida pobera, ma cussa fuit sa vida mia, pobera e dinnia. Non tenìu bisiones de mannesas, mi fui acunnortau, e cuntentau, de abarrae in custas tancas selvaggias, pastorigande arbeghes po tottu vida. Invezes, a pagu prus de bint’annos, in sa mezus edad’e pizzinnìa ,su guvernu italianu mic’ada, de obrigu, liàu a gherràe; a bocchidi atiros pizzinnos, de degheotto-bint’annos issos puru. Pizzinnos chi no connoschìu, chi no cumprendìu po nudda mancu coment’alleganta, chi no m’ianta fattu nudda. “Cunnu chi s’at coddau, za m’eis bene sistemmau!” Propriu como mi chi depianta liàe, como chi fui ponendemi bene cun su bestiamene, pastorigande po contu meu, liberu che fera,senze meres perunos, como chi fui cominzande a fastizzàe cun d’una zerachedda de bidd’istranza, pilli castanza, oghi niedda e sinuda, trempi ruia e pibiruda, chi mi fiada furriàe sos crebeddos e buddidi su sambene in s’intrannia. Raios chi s’essere callau, prim’e mic’aet pinnigau! No dia cheriu propriu andae in gherra, ca mancu ita fuit gherra ischidiu. Fui creffiu abarràe in bidda mia.

Appu tentau de mi fuidi, de mi zae a bandidae, ma amigos “irredeentistas” m’anta traìttu, e m’anta presighìu cun sa dustizzia po mi chi pinnigàe, po mi mandàe a culu forzau a su fronte. E osi ammorozza a us’e pegos de mazellu, s’anta imbarcau po andae in Italia a gherrae.

Beh, nessi po’ sa prima orta bidìu un piroscafu, bidiu su mare, bidìu su trenu, sas zittades e biddas medas, deo chi no connoschìu mancu sas biddas de su zircundariu de sa idda mia. Fuaus medas sos sordàos in “grigioverde,” tottus pizzinnos, s’in prus tottus pastores e messaios in su “151 e su 152″ rezimentu. Su iazu chi eus fattu, pariad’una festa: tottus fortes, tottus corazzosos, sardos balentes, zogadoes a sa murra e cantadoes a poesia, a tenore, a repentina:

“Su chentuchimbantunu rezimentu chin su chimbantaduos tott’in pare, non sezis bois sos continentales c’azis mantesu su trinzeramentu”.

Poscas, finìu su iazzu, eus bistu s’Italia, connottu sa gherra. Connotu su fronte, su, trinzeramentu, sas bombas, sa mitrallia, su gas, sos assartos, a de dia e a de nutte, a ferru firtu e a mazzucos ferraos; eus connotu sa timmorìa, su famene. Donni’orta chi besseiaus a s’assartu, “e besseiaus meda,” a nois, a sos sordaos sardos, tottus si timianta, ca fuaus gherreris “dimonios”. Ma donni’orta medas de nois no torranta, abarrant’issempiàos de sas ballas, de sas granatas, mortos in terra, arrugaos, cravàos in sos punteddos accuzzos de su fillu ferr’ispinosu. Balla ca si fudi passad’impresse sa gana de cantàe, e de zogàe, nemmos prus cheriada bessidi foras de sos cagadorzos pudidos, e abbardinosos, de sas trinzeas.

Issaras si fianta bessid’amoroza; opuru si faianta bocchidi, commente viles traitores, de sos cumpanzos nostos etottu o de sos carabineris. S’imbriaganta po si faede corazzu, po chi cazzae sa timmorìa, su firtu, su famene, po’ si faed’onore e groria. Andaiàus a bocchidi sos atiros pizzinnos, mortos de fammene peus de nois.

E za ind’apu bochiu.

Nd’apu bochiu medas: a fusilladas, cun bombas a manu, e nd’appu finamentas ispaiollàu, cun s’arburesa chi mic’aiu liau de idda, ca non bessìu mai chenz’e sa leppa mia in bussaca.

E si, nd’apu propriu mortu medas, fizzos de bagassa innozentes, in Monte Zebbio e in sos altopianos. Tantu tempus, passaiaus semper’in sa trinzéa, tottus paris, bios e mortos, in mesu de pistullenzias, merda, pulighi e priogu, fu’imparande finamentas a iscriede e a foeddàe s’italianu: “Monte Zebbio, Monte Grappa, Caporetto, Piave, Asiago, Adamello, Bainsizza, Carso, razzi, frasche, Trento, Trieste, Austria, Veneto, patria, eroismo, coraggio”. Tottu foeddos Italianos.

Una limb’istranza, chi po nudda connoschìu, simizante sollu in pagos foeddos a sa limba sarda.

Una dia de attonzu, cottos de abbardente e de cordiale, “podianta mancae sas ballas, sas bombas, s’ite poppae, ma s’abbardente no podiat mai mancae,” torràus a bessidi animaos de s’imbriaghera, su “zigarru ancora alluttu de sa notte, afferràu a mossu a fog’aintru,” besseus po un attir’assartu, per “l’ultima spallata”, ianta nau in su cumandu. “Corazzu pizoccos”, s’aiat nàu su capittanu, “corazu e culu frimmu”. “Aiò, forza paris! Forza paris”, zirriaiàus, currende tottus’impare foras de sas trinzeas.

Forza paris, fui sa oghe in mesu de su fogu inimigu tedescu.

Sos carabineris ivattu nostu, onnia tantu isparant’issos puru, ma isparanta a nois, a sos chi no curriant’ananti. No cumprendeiàus si funt’amigos, o inimigos.

Deo currìu in mesu de sos tuvones apertos de sas granattas, currìu conchibassu, sartiande fertos e mortos fattos a cantos, curriu facc’a su entu firtu, fac’a s’inimigu, cun su fusìlliu a baionett’innestada, aboghinande e frastimande, comente su dimoniu chi fui diventau. Candu, ind’un lampu una mitralliada de ferru buddiu, m’ispacat sos chizzos, e un’astulla de granata, m’apperidi sa entre, mi seo frimau.

No appu fatt’a tempus mancu a penzàe a sa idda mia, a sos cumpanzos cantadoes, de batorinas e poesia, a sas’arbeghes in sas baddes solianas, a sos montes de armidda, a sa zerachedda oghi niedda e sinuda lassad’in bidda.

Appu fattu aiz’a tempus a murmurae “mamma”, e deo puru, cun sa cara issempiada chi no si connoschiat prusu, a mazz’in foras, seo diventau senze du cherrede Eroe ignoto de gherra. Eroe italianu…

Pagu tempus apustis, sa “Grandu Gherra europea” si finìada, eus bintu! Si torrada tottus in paghe, festaos de sas fanfaras de chia sa gherra d’iat crefia, ma non d’aiada no fatta ne bista. Sos sordàos bios e sos istrupiaos suntos torràos a bidda, carrigos de onore e groria, ma tristos e poberos peus de prima.

E deo, it’appu bintu? Ita m’anta fattu? Ita m’anta zau?

Deo appu perdiu tottu, appu perdiu sa vida, chi no appu fatt’a tempus mancu a connoschede, seo abarrau po semper’inìa, accanta de sas trinzeas in cussos montes niàos, interràu ind’una fossa, cun atiros chentu “dimonios sardos” che a mie, tottus immentigàos, disconnotos, chenze cara, chenze nummini, ma cun su titulu de Eroe de sa Patria Italiana… Custa est’istetia sa binchida mia!

Su cunn’e mamma tua buttana!

Diegu Zoccheddu