S’annada mala, de Gianni Loy

Su sabodo de sa poesia in sardu‘: Gianni Loy, 7.

Torrat s’annada mala.

De nou sa terra

s’est siccada.

Arrius de prantu,

de disisperu,

in sa campagna

abbandonada.

 

Torrat s’annada mala.

Agoa de s’inferru

de su fogu

immoi sa cilixia

e s’asciuttori

si fainti meris

de dogna logu

 

Torrat s’annada mala.

E furriat a tristura

custu cantu.

In sa campagna

torrat sa cilixia,

in coru meu

torrat su prantu.

 

Torrat s’annada mala.

Torrat, eppuru

hat a passai.

Arrius de latti,

campus de soli,

funti po chini

s’hat a agattai.

 

Mes’e idas 1988