Su sabodo de sa poesia in sardu‘: Gianni Loy, 5.

Attongiu, de Gianni Loy.

Su soli est abbruxendu sa pastura,

s’est siccau fintz’e s’urtimu arrizolu.

Sa campagna si prenit de tristura,

chena prus paxi e chena prus consolu.

Incruaus a sa terra de mill’annus,

pareus preguntendu un’arrexoni.

Su soli est abbruxendu sa pastura

e deu sigu cantendu una canzoni.

Unu fradi, sa vida si da giogada

in d’unu lettu biancu de uspidali.

Su coru unu dottori di forrogada

unu by-pass po du torrai normali.

Puru s’aria si frimmad’a abettai,

in s’ora ch’est mudendu s’istasoni.

Unu fradi sa vida si da giogada,

et deu sigu cantendu una canzoni

Si nd’andada s’attongiu, a bell’a bellu,

is diris no’ si ndi olinti scappiai.

Non de una rosa, mancu unu gravellu

o un’illusioni po mi cuntzolai.

E sigu su camminu, a pass’a passu,

propri ‘immoi chi ch’est mudendu s’istasoni.

Si ‘nd’andada s’attongiu, a bell’a bellu,

e deu sigu cantendu una canzoni.

1982

Condividi su:

• 
•