E MAJU S’IN CH’EST ANDAU…, de Aldo Lino
POESIAS e PINTURAS (9) de Aldo Lino. Sighèus sa rubrica in limba de su sàbodo in poesìa campidanesa, a sa moda de Sobarùssa.
E MAJU S’IN CH’EST ANDAU…, de Aldo Lino
E maju s’in ch’est andau
Lassendi adringiau su logu
Cun fror’e croccoriga
E s’ispantu ‘e s’aniada
Chi potta milli froris
Su logu est’adringiau
De arrosas biancas e grogas
Arrubias e in caor’e arrosa
Cosidas in sa pitturra
Cosidas e arricamadas
Me is pitturras licchitas
Licchitas e generosas
De ogn’isposa bella
Coberada in bidd’e monti
De bajanas affroddieras
Ch’istentant’in funtana
De pobiddas murrungeras
No funti mai cuntentas
De fanceddas crabarissas
Ciappadas a mau furada
Po no ‘ddu sci’ nisciusu…
Arriba su mes’e lampadas
S’aidi e’seberendi
Abbrancada a sa canna
Comment’e unu caoru
E faidi bella mosta
In sa cammis‘e linu
Caor’e zaffanau
O punta de asullette
Prenzada e imbidoada
Meraviglia de arricamu
Po criccai amigus bellus
Po ciappai cumpannia
Su esper‘e Santu ‘Anni
E ammirai su fogu
Fattu cun su sramentu
Chi t’arrubiad’in cara
E lambrighittad’is ogus
Su coru no’iscarescidi
Cuss’amiganzia bella…
Chi dura tottu s’annu
Chi dura d’ogni annu…
(a.l., primo giugno 2020).
