UNA PRIMA DIE DE MAJU SENTZ’E TREBBALLU IS SANTOS PATRONOS NOSTOS S. ANTIOGU E S. EFIS SENTZ’E PÓPULU
Primu de Maju 2020 tristu, sentz’e trebballu, cun is fàbbricas e totu is Aziendas serradas, is massajos e pastores disisperaos, e milliones de trebballadores disocupaos, cudhos de is “partidas” IVA sentz’e amparu, is artigianos, cummerciantes piticos, cudhos de is mercaos in pratza, e is trebballadores de s’ispetàculu sentz’e faina, unu pópulu intreu acorrau in domo timendho de nosi buscare custu virus chi mancu si biet ma tropu perigulosu.
Su Covid-19 at bochitu e sighit bochindho a milas e milas féminas e ómines in Itàlia e in totu su Mundhu, lassandho desertu e isperdimentu.
Nos’irbetaus de torrare a “sa tenta” cun is dificurtades de una crisi sanitària, sociale e económica mundiale e grae meda.
Sa Sardigna, giai tropu débbile po su chi est su cuncordu de s’istrutura sanitària, sociale, económica, est in perígulu e arriscu de no arrennèscere a ndh’essire.
Po cussu tocat a èssere unu pópulu uniu chi faet fronte luego e cun coràgiu, ànimu mannu, faet fortza cun ispera e fidúcia po unu benidore cambiau in méngius.
Is Santos Patronos nostos Sant’Antiogu e Sant’Efis nosi agiudent po bínchere cust’àtera apesta! Nosi ndhe paret male a dhos bíere in crufessone cun d-una pariga de guàrdias ma sentz’e acumpangiamentu mannu de pópulu chi faiat festa passandho e prenaiat istradas e pratzas de citades e bidhas.
Ocannu coment’e Cunfederatzione Sindacale Sarda fustis prontos po afestare su Primu de Maju nostu in su Sulcis po arregodare duos dannos graves, proponendho a is trebballadores e a s’Istitutzione Regionale de istabbilire s’11 de maju po Festa de is Trebballadores Sardos.
Ca cussa est sa die chi sa Prefetura de Castedhu (su Guvernu) s’11 de maju 1920 at mandhau a Iglésias is guàrdias “régias” contr’a sa protesta de sa gente famia po su pane, e ant isparau e bochitu sete minadores in isciòpero, tra sa carrela Sabbustianu Satta e sa Pratza de su Municípiu.
E proponeus de arregodare s’àteru bocimentu mannu: su 4 de maju 1871, apitzu de su capannone de Montiéciu inue furint drommias crocadas in terra is féminas e is piciochedhas chi isceberànt su materiale, che dhis orruet su depósitu de s’àcua e ndh’at bochitu 12 tra piciochedhas e mannas e istrupiau àteras. Sa “inchiesta” de is meris de is minieras at fuedhau de “disgràzia”: ma candho mai a fàere drommire sa gente acanta e asuta de unu depósitu de 80 metros cubbos de abba?!
Noso de como nosi giaeus apuntamentu a s’11 de maju 2021 in Iglésias po ambaduos custos fatos e fàere su Primu de Maju Sardu.
Castedhu, 1 de maju 2020
Su Segretàriu Natz.le de sa CSS Giacomo Meloni
TRADOTTO IN LINGUA SARDA
DAL PROF.MARIO PUDDU
