Pagu ti ndh’at dadu! de Luciano Carta
Sos contos de Luciano Carta
Totu sos dischentes de s’iscola de sa iddha, mascros e feminas, aiant abbozadu a cresia po sas duas oras de Religione. Intro a sa cresia, comente s’usaiat tandho, sos mascros si che poniant totu a dresta e sas feminas totu a manca. Tandho fit fazile a fagher sa divisione, ca sas classes non fint mistas, comente s’usat como, chi sunt totu a meschiu, e mai est capitadu chi sos pitzinnos mascros aèrent una mastra e-i sas feminas unu mastru.
Sa cresia fit totu una muida rumorosa de boghes acutas e allegras. Asiu ndhe teniat mastros e mastras a narrer a cussu esercitu de pitzinneddhos a s’istare mudos e a fagher zinnos cun su poddhighe drittu postu in bucca po cherrer narrer de non fagher totu cussu chimentu indiauladu.
Tra sos dischentes bi fit puru sa classe Terza de Mastru Billia, una trintina de tilibrios totu abbistos e chimentosos. Tra issos bi ndh’aiat duos, unu lanzu lanzu chi pariat una canna moida dae su ’entu, chi si naraiat Piero, ma sos cumpanzos li naraiant Pio, e un’ateru rassittu e cun d’una faccigheddha tundha e ruzza, chi si naraiat Bacchis, ma sos cumpanzos li naraiant Bacchisereddha.
Fint sos annos, a sa fine de su Chimbanta, chi puru in sas biddhas aiant battìdu sa televisione e in sa “TV dei Ragazzi” daiant sos telefilm de Rin.tin.tin e sas comicas de Onlio e Stanlio. Sos duos pitzinneddhos pariant fattos aposta po imitare sos duos comicos americanos e difattis in iscola fint sempre paris e istaiant faghinde sas boghes e sas mossas de Stanlio e Onlio. Sos dischentes, candho sos duos cumpanzeddhos cominziaiant a fagher s’imitassione, si poniant a riere totu cantos e adiu lezione! E sa matessi cosa fit in s’ora de ricreatzione paris cun totu sos ateros cumpanzeddhos e cumpanzeddhas de sas ateras classes. In pagu tempus fint diventados sos comicos de sa corte de s’iscola de totu sa iddha.
Fit in su zerru de su ’56, s’annu ’e su nie, chi fit duradu pazz’e meses e Mastru Billia si fit irmalaidadu assumancu po duos meses. A supplire fit bennida una mastra giovaneddha oroteddhesa, mastra Lostia, chi, mancari sa Direttrice non cherferat, si ch’aiat cuadu una bacchetta nodosa in s’armariu e a donzi mancantzia iscrabilaiat a conca a sos dischentes chi faghiant a malos chi fit una bellesa.
Sa die de sa lezione de Religione in cresia, paris cun totucantas sas classes, fit pro Pio e Bacchisereddha un’occasione de non perdere. Sa classe che fit sistemada in sa cresia a sa parte ’e nanti, affacca a sa trona, e totu cantos los podiant biere, mancari ch’esserent a largu. Si che sunt pigados subra su sezzidorzu de su bancu e ant cominzadu a fagher sas mossas de Onlio e |Stanlio. A fagher riere pitzinnos minores bi cheret pagu e po una deghina de minutos sa cresia fit totu un’iscracalliu de risu in donzi cutzone.
Sa mastrigheddha malaitta at lassadu faghere, ma si bidiat dae sas ogradas chi fit meditandhe s’ira funesta.
A ora de mesudie totu sos dischentes sunt torrados a s’Iscolasticu.
Sa mastrighedda, comente sa classe s’est assentada in sos setzidorzos, onzunu in su postu suo, at cramadu luego a Pio e a Bacchisereddha a sa cattedra. Lis a fattu ponnere sas manos in subra su pianu, ndh’at bogadu sa bacchetta nodosa e at comintzadu a iscudere a cussos poberittos, vinti corpos a donzi manu, in totu 80 corpos de bacchetta, baranta a donzunu. Cussa dimonia non s’est frimmada mancu a sas lambrigas e a sas lamentas de sos duos poberittos. Sunt torrados a su bancu cun sas manos biaittas e Bacchisereddha, chi in zerru suffriat de pirinzones po su frittu, che zughiat sos poddhighes trapàdos in sambene e a casiddhu.
Finida s’iscola Bacchisereddha est remuìdu a domo e at contadu totu a sa mama. Sa bona femina, ch’ischiat cantu su fizu fit disculu e non si ndhe podiat fagher bonu de peruna manera, invezes de lu consolare, sigomente fit de sa matessi idea de sa mastra addobbadora, l’at nadu: “Pagu ti ndh’at dadu de fae a nae, como eo ti dao su restu!”. E l’at sestadu parizzas iscringadas de tzinta a sas ancuzzas nudas.
Candho si narat corrudu e fustigadu!
