La mia gatta è prossima! de Luciano Carta

Sos contos de Luciano Carta.

In su Chimbanta in ’Oloène su Rettore no andhaiat a sas iscolas a faghere s’ora de Religione, ma a mesu ’e chida sos pitzinnos recuiant totu po duas oras dae sas Iscolas a sa cresia parrocchiale e inie si faghiat sa lezione a totu sos pitzinnos de sas Elementares.

Fit una lezione unu pagu ispetziale. Su Rettore, don Gianni, fit meda brulleri e ischiat fagher divertire sos pitzinnos, imparandhe a issos, in su matessi tempus, cosas bonas e istruttivas.

Una ’orta su tema de su lezione fit su parabula de su Samaritanu.

Primma l’at fatta lezzere dae s’Evanzeliu de santu Luca (Lc, 10, 25-37) e apustis at cominzadu a preguntare a sos pitzinnos varias cosas po biere si aiant cumpresu. E dimandhaiat inue s’agattaiat Gerico; chie fit su primmu chi est passadu su poberittu feridu e l’at lassadu comente fit etotu in terra, feridu e ammaudinadu; chie fint sos Levitas; inue fit sa Samaria, e gai sighindhe.

Poi est bennida sa dimanda pius importante: su Samaritanu at curadu su poberittu e at pagadi sas curas, ca cheriat bene a su prossimu suo.

A unu zertu puntu don Gianni at dimandhadu:

Chie m’ischit narrere it’est su prossimu?”.

E sos pitzinnos, totu a manu artziada, cheriant rispondhere.

Don Gianni, tra sos medas, at bidu una pitzineddha minuda minuda de primma Elementare, Caterina, chi aiat arziadu sa manitta. L’at cramada a inue fit issu cun su microfono in manos.

Candho sa pitzineddha ch’est arrivada affaca a issu, l’at dimandhadu:

“Allora, Caterina, tu sai dirmi chi è il tuo prossimo?”.

E-i sa pitzinneddha, cun d’unu filigheddhu de ’oghe, comente chi esseret improverandhe a su Rettore, chi segundhu issa aiat nadu cosa chi non fit dèchida, at rispostu:

“Don Già, la mia gatta è prossima!”.