Ego montabo e ipse baptizabat!, de Luciano Carta
Sos contos de Luciano Carta.
In atunzu, candho fit su tempus de bettare s’incunza, sos massazos recuiant totu a su fraile de mastru Zuanne po acutare sas arbadas o po ferrare su zuo. Sa ferradura si faghiat in Dracheri sa dominiga manzanu, appustis de sa missa ’e chitto, ca intro ’e chida si deppiat tribagliare in su campu po semenare. E fit in sa macchina de ferrare, in Drachèri, faghindhe faina, chi mastru Zuanne, dischentes, massazos, pastores e orèris istaiant faeddhande de onzi chistione, brulletandhe e zinzigorrandhesi pari pari.
Mastru Zuanne fit meda cresiasticu e aiat professadu medas bortas comente priore de sa Cunfraria de Zèsu Cristu paris cun sa muzzere priorissa. Pariat issu, sa Chenabura Santa, candho si faghiat in cresia s’Iscravamentu, su Babbu mannu de sa zirimonia. Bestìdu de zudeu, paris cun mastru Franzischeddhu, su mastru ’e muru, che pigaiant cun solennidade in sas iscalas, onzunu a un’ala de sa rughe manna, cun Cristos cruzificadu. Onzi ordine de su preigadore chi li arrivaiat dae sa trona, issos lu faghiant luego.
“Bogadechèli, a su Fizu ‘e Deus, sa corona de ispinas e mustràdela a su populu”, naraiat su preigadore.
E mastru Zuanne, solenne, ndhe ’ogaiat sa corona dae sa conca de Zèsus e la mustraiat a su populu, in sa cresia prena a càttigu.
“Bodachèli sos craos dae sas manos e mustradelos a totus”. E onzunu de sos duos Zudeos, dae sa rughe, mustraiant sos craos e apustis de los aer basàdos, los apporriant a sos Angheleddhos chi bi fint in bassu cun d’unu concaleddhu de prata e che lu poniant intro.
E poi sa parte pius cummovente de s’Iscravamentu.
“Falàdeche dae sa rughe su corpus santissimu de su Sarbadore nostru e ponidelu in brazzos a sa Mama dolorosa chi est in pes de sa rughe”.
E sos duos priores, cun d’unu lentoìu mannu, abbassaiant sos brazzos de su Cristos e a bell’a bellu, lu mustraiant a sa Mama ’e sos Dolores, e apustis in su sepulcru approntadu in mesu a sa cresia, totu inghiriadu dae sas lampanas alluttas e dae sos vasettos de su nènnere.
Tra unu zou e s’ateru, sa dominiga, ferrandhe in Dracheri, mastru Zuanne de tantu in tantu che li ’essiat carchi frastimeddhu e carchi peraula mala, o ca su dischente non li porriat bene sos trastes, o puru ca sos omines chimentosos infadaiant s’animale ligadu in sa macchina ’e ferrare e iscudiat carches candho su mastru fit ferrandhe sos pes de nanti.
Tandho sos amigos pius malinnos li naraiant:
“Mastru Zuà, ma unu, fattu a priore de Zèsu Cristu che a bois, no zuat chi si ponzat a frastimare”.
E mastru Zuanne:
“Nah! Candho bi cheret bi cheret!”.
E daiat a s’insolente unu corpu de maniga de marteddhu de ferrare, chi zughet un’ispatula lada in coa.
Mastru Zuanne teniat una famillia manna de otto o noe fizos. Carchi ateru issoccadore tandho li naraiat:
“Mastru Zuà, elle proite bos azis fattu totu cussa cheddha ’e fizos!”
E mastru Zuanne, dandhesi una furriadeddha a sos mustazzos:
“Paret chi tue no iscas ancora comente naschet su caule! Sos fizos non los appo fattos deo, ma muzzere mia!”.
E si pesaiant totu a riere.
Naraiat un’ateru:
“Nade, mastru Zuà, ma su preideru non bos at mai fattu improveru, fattu a priore de Zèsu Cristu, po totu sos manighinzos chi li daìzis cun tantos fizos?”.
E tandho mastru Zuanne, chi fit oroteddhesu, rispondhiat luego in sa limba sua, comente chi daèret un’istoccada, sempre prontu a donzi zinzigorru:
“Eo montabo e ipse baptizabat!”.
A onzunu s’arte sua!
