Ti amo! a sa Sardigna e a sos Sardos, poesia de Mario Pudhu
Dae sa Fondatzione Sardinia sos AUGURIOS de BONAS ‘ESSIDAS e MEZUS INTRADAS in su 2020 (fintzas a sos Sardos de Biella, in sa fotografia innoghe asutta).
Ti amo
No mi ndhe poto istare, zente amada,
tue sàmbene meu e carre mia,
e m’est trummentu, dolu e maladia
pro cantu ses penendhe dominada!
Sa libbertade tua cherzo e bramo
ca est su bene tou su chi amo!
Sardigna, prendha, rica ‘e donzi bene,
a tilipendhe ses, disisperada!
però s’ispera puru est destinada,
che a totu sos àteros, pro tene!
Tandho, fortza! Corazu! Tot’unida,
ca in sa libbertade bi est sa vida!
No istes a birgonza, umiliada:
pesandhela, sa conca! Est fatu die!
E, mai prus, non dias fide a chie
ti muntenet derruta, iscaminada!
Fàghedi onore, libbertade e istima:
fortza, Sardigna, pèsadi e camina!
Ba’in bonora, bae, terra mia!
E sias beneita, amada zente!
Ti lugat in su chelu eternamente
s’istedhu de sa paghe a fagher ghia!
Fàghedi onore, libbertade e istima:
fortza, Sardigna, pèsadi e camina!
(l’apo intitulada Ti amo ca T’istimo fit su títulu de cussa in sa cobertinedha de Su zuramentu)
T’istimo
ca sas carres e sàmbene mi as dadu
e s’ànima chi Deus mi bi at postu
as cariadu
cun sinnos e piessignos
chi distinghent s’identidade tua.
E no mi est presone
s’illacanada làcana ’e su mare
ca mi est màtria e pàtria s’universu.
Ma si méritu tenzo o apo neghe,
si unu pódhighe mugro o ponzo passu,
so inoghe
ue so su chi so
cun totu su chi pesat
ca prus connosco e istimo a tie
pro sínchera e sintzilla libbertade.
