Unu bagnu in Calabona, de Luciano Carta

Sos contos de Luciano Carta.

Sa vida de sos istudentes in su Seminariu de S’Alighera teniat unu ritmu sempre uguale. Su manzanu a pesare a sas 6 e mesa, poi sas orassiones in sa cappella, sa meditatzione, sa missa, s’irmurzu e s’iscola. Poi s’istudiu. A ora de sas battoro de sero onzi die bi fit su passizu de un’ora e una barantina de giovaneddhos tra sos 11 e sos 16/17 annos ch’essiant totu in fila e andhaiant a passizzare in su caminu chi ch’andhaiat a Calabona, a longu a longu in sa costa. Cominzandhe su caminu b’aiat un’ispettaculu bellu: su casteddhu de su conte Mella di Sant’Elia, in Las Tronas, comente naraiant sos Saligheresos, a subra de Lo scoglio dei preti. Fit istadu bellu a ischire narrer sos numenes in saligheresu, ma nois montagninos fimis meda repellos a l’imparare. Ischimis faeddhare solu su logudoresu, ma fimis proibidos de l’usare, ca sinono nos paniant a pane e abba po unu sero. Ischimis solu narrere: “mignò matarès” (pitzinnu malu) e “A calbò” (saccu de carbone) ca fint sos improveros chi nos naraiant sos ateros pitzinnos o giovanos candho essimis po andhare a sa cattedrale de Santa Maria; infattis fimis bestidos de chirichettos cun sa este talare.

Tra sos istudentes, sos montagninos fimis medittos ca sa diocesi de S’Alighera dae sa zittade catalana si ch’illonghiaiat finzas a Oniferi in su 1939 e appustis finzas a ’Olotene. De sos montagninos, in pagos aiant bidu su mare finzas chi non sunt andhados a istudiare a S’Alighera. De su mare in sas biddhas issoro issos connoschiant solu sa sardina, su surellu e su zarrette, chi ’attiant a bendhere propiu dae S’Alighera in sa zozza o in ateras occasiones. Tra Macumeresos, ’Ortigalesos, Duarchesos, Boreresos, Biroresos, Silanesos, ‘Olotenesos in su ’59 -’60 fimis medas: una bindhigina. Rettore fit duttor Zolo, unu canoligu lanzu e minoreddhu de istatura, chi nos fit puru professore de latinu.

Lughianeddhu, chi a tandho aiat bidu solu una ’orta su mare in Platamona, no aiat mai ’idu sos iscoglios; li piaghiat a morrere a biere su mare chi in sas dies de ’entu si ch’istrampaiat forte contra a issos, ispruzzandhe e arziandheche a su chelu bettes zuffos de abba marina (i cavalloni), chi poi si bidiant torra falandheche a su mare comente tantos traìnos.

Un’amigheddhu saligheresu – Carletto Demartis, chi Deus l’appat in sa gloria -  m’aiat fattu connoschere sas patellas attaccadas a sos iscoglios e mi las aiat fattas manigare. Cantu fint bonas! Cussu sì chi fit veru sabore de mare! Atteru che su pische mesu pùdidu e-i sas sardinas, chi po che las ingullire sas mamas las faghiant impanadas! Dae tandho sa ibba mia, candho s’andhaiat a passizu, fit de si ponnere in burzacca sa leppeddha, chi non si fit irmentigadu de si ’attire dae ’iddha, e istaiat a pes iscurzos in s’abba, chircandhe patellas in sos iscoglios pro ndhelas istaccare a punta ’e resorza e si las manigare.

Candho ’eniat sa fine de su mese de maggiu, carchi die sos istudentes che los leaiant a fagher su bagnu pius a dainanti de Las Tronas, propiu in Calabona, inue b’aiat un’ispiaggigheddha e iscoglios chi fint faziles a si che pigare e a che los iscalare appustis fattu su bagnu, po si corcare subra s’abbammanu isterridu e si leare su sole in sa parte arta de s’iscogliu che su tilipirche cacarru a bentr’a sole.

Guasi totu, in sos istios de campeggiu de sos annos passados, fattos in s’ispiaggia de La Speranza, in su caminu ’e Bosa, o in Tramariglio, aimis imparadu a nadare.

Una die don Masala, su vice-rettore boreresu, nos aiat nadu a nos bestire su costuminu ca noche leaiat a fagher su bagnu. Fit sa primma chida de lampadas e sa calura si faghiat intendher bene.

Arrivados a su mare de Calabona totu si sunt ispozzados e via! totu in mesu a s’abba comente sa laghinza a paschere, chie peressi peressi a abbaidare a fundhu cun sa mascara e su boccagliu, chie a si divertire in sa rena russa e in sas pedras in oru

’e mare e chie si ch’est bettadu a nadare po ch’arrivare a s’atera parte, inue b’aiat a fronte un’iscogliu meda artu po l’iscalare dae sutta.

Bacchis s’annu fit de sos mannos e fit in su ginnasiu. A nadare l’ischiat, ma forzis est istadu troppu attrividu a si che andhare a s’abba arta. Fatt’istat chi a unu zertu puntu at cominzadu a annaspare in mesu a s’abba e a abboghinare. Sos cumpanzos, arriscandhe issos puru, chircaiant de lu mantenner a galla, ma dae fora si bidiat chi su poberittu si fit mascandhe bene bene de abba salida.

Paris cun sos istudentes b’aiat unu giovanu robustu, chi candho at cumpresu su perigulu, si ch’est subitu tuffadu a mare, ch’est lompidu a inue bi fit su perigulu e, espertu comente fit, at afferradu a Bacchis a palas e ndhe l’at battìdu in salvu finzas a s’iscogliu. Totu semus curtos a inghiriu de Bacchis, chi che zughiat sa ’entre totu unfrada e pariat raidu. A bell’a bellu sa pessone chi l’aiat salvadu l’at bortadu a car’a terra e su poberittu si ch’est illibberadu de cussa buffada non disizzada de abba salida.

Totu sos cumpanzos cun sos Superiores cussa ’orta ant nadu de coro grassias a Deus, ca su perigulu fit istadu mannu deabberu. E sos montagninos ant imparadu chi non fit perigulosu solu su Riu Mannu aundhadu, comente aiant intesu narrer in biddha issoro dae sos mannos, ma su mare, mannu e isconfinadu, fit meda pius perigulosu e bisonzaiat de lu connoschere primma de si ponnere a l’isfidare.
S’annu Bacchis fit in IV Ginnasio e in sos esames de idoneidade in su Liceo “Manno” de S’Alighera, sigomente fit giovanu abbistu e intelligente, ch’est bessidu approvadu cun bellos votos.