“Tonto Dio! Che cosa hai detto!” a canoligu Piu professore de Grecu, di Luciano Carta
Sos contos de Luciano Carta. I S’Alighera (foto del Duomo.
Su professore ’e Grecu de su Ginnasiu in S’Alighera fit unu canoligiu minoreddhu, meda bravu e simpaticu e sos alunnos li cheriant meda bene. Fit canoligu Penitenzieri in sa cattedrae candho, in sas solennidades si estiat cun sa este paonazza, fit una bellesa a l’appompiare: lughidu e isplendente, pariat issu un’istaueddha de porcellana. Mancari esseret puttumaggioresu, li piaghiat a faeddhare su saligehresu e po cussu sos dischentes li naraiant “Lu canongia”.
In su ’35 fit andhadu comente cappellanu militare a sa Gherra d’Etiopia e forzis unu pagu fascisteddhu est adduradu in sa vida sua, assumancu a su chi si podiat cumprendhere dae sa manera comente contaiat, a bezzu, sa vittoria de sas armas italianas e sa naschida de s’Imperu.
Contandhe, s’assentaiat in sa cattedra e cun boghe intonada e solenne cominzaiat, cun un’ispezia de “esse” chi ndheli essiat comente sulada in sas dentes, chi fit su difettu suo de pronunzia:
“Quando ad Addìss Abebà entrò Sua Eccellenza Badoglio a cavallo di un destriero bianco, a Roma il Duce proclamava la nascita dell’Impero d’oltremare!”
Onzi tantu si pesaiat a cantare cantos de cresia de su ritu etiopicu e prima de cominzare sa lezione faghiat sempre narrere s’Ave Maria in grecu.
De carattere fit meda amabile, ma si capitaiat de irbagliare unu verbu grecu, s’arrennegaiat meda e sa letania sua fir sempre:
Santo Dio,
In su ’62, a sa fine de s’annu, primma de andhare a dare s’esame comente privatistas in su Liceo-Ginnasio “G. Manno” de S’Alighera, fimis totu paris, sos alunnos de IV e de V Ginnasio, ripassandhe sos verbos irregulares.
A unu certu puntu at dimandhadu a Paulu:
“Imperativo di kathiemi”.
E Paulu, prontu:
“Kazoù, kazèso, ecc.”
Su canoligu, arrennegadu comente non mai, ch’at bettadu una bette ’oghe e at nadu.
“Tonto Dio, Paolo, che cosa hai detto!!?”.
Paulu si che fis irmentigadu chi cussu verbu non faghet sa contrazione de “eso” in “ou” e si deppet narrer “kàzeso” e non “cazoù”, chi non fit una peraula dèchida, ispezialmente si li che fit bessidu in s’esame in sas iscolas prubicas!
Lu canongia puru in s’arrennegu, invezes de narrer “Sssanto Dio” (cun sa tipica “s” sua, nada a sulu), che li fit bessidu “Tonto Dio!”.
E in bucca a unu canoligu penitenzieri non fit propriu peraula dechida.
Totu podimos irbagliare.
