“Marcellino pane e vino”, de Luciano Carta

Sos contos deLucianeddhu.

So naschidu e creschidu in su coddhu de Coronas, in sos oros de fora de sa iddha, chi est fatta totu in pigada.

Sos Coronesos, eia, fimis riccos, ma de ’inari chi non curret!!! Po cussu fimis bonos zogadores a s’arziu.
Bos cherzo contare, subr’a custa ricchesa, un’esperientzia personale.
App’aer tentu 8/9 annos e deppìo essere in terza o quarta elementare.

Fio frequentandhe sa dottrina in Sede e sas catechistas aiant dezzisu de proiettare a sos pizzinnos in sa sala de su cinema su film Marcellino pane e vino. Su Mastru su contu nos l’aiat lezzidu in iscola e lu ischìa meda bene, ma a lu ’iere in su cinema fit un’atera cosa.

L’aìo nadu a mamma e issa m’at rispostu chi de ’inari no ndhe tenimis. Appo prantu totu su manzanu e, appustis carchi ora, esseret chi fit istracca de mi bier prantinosu o chi s’esseret cummovida deabberu, m’at nadu:
“«Lèh! duos oos, bae a domo de tiu Pedru Nieddhu e narali a sa muzere si ti los comparada e cun su ’inari chi b’essidi andhas a su cinema».
Su pretziu de su biglietto fit 15 francos. Che so faladu a bolu a domo de tiu Pedru, ch’istaiat a muru ’e mesu de tiu Bacchis Perra, in via Marconi.
Appo àppidu maridu e muzere e lis appo nadu:
«At nadu mamma si bollos comporades duos oos ca deppo andhare cun totu sos pizzinnos de iscola a biere su film de Marcellino pane e vino».
L’ischiant issos puru, ca aiant intesu su bandhu.
Tia ’Ittoria m’ammento chi m’at carignadu sa faccigheddha chi zughìo tundha, colorida e simpatica. De seguru at cumpresu chi non si podiat narrer chi nono a unu pizzinnedhu chi no ndhe podiat faghere a mancu de andhare a su cinema cun totu sos pizzinnos de su Catechismu e de iscola.
M’at nadu:
«Eia, siendha mi’, elle poite no ti los comporo! Lèh 20 francos e tantos saludos a Lughia, mamma tua»”.
Penso de non l’aer nadu mancu gratzia; appo leadu su ’inari istrintu istrintu in sa manu dresta e che so pigadu a bolu: sas iscalinnas de s’arcada de tia Basila as appo fatta a tres sa ‘orta e che so arrivadu abbatandhe a domo po dare su ’inari a mamma.
«Como mà – l’appo nadu – non b’at pius istìbas! Si ’inari de su cinema mi lu deppìdes dare!».
A sas duas e mesa che so faladu dae Coronas a piazza in bolos de ’entu, faghindhe de tantu in tantu brincos de cuntentesa. Su film de Marcellino pane e vino non mi l’appo a irmentigare mai. M’at cummovidu fintzas a pranghere.
Torranndhebei a pensare, però, a mannu, non fio gai seguru chi mamma mi aeret bogadu un’istìba po non mi cherrer dare sos duos dinaris de su biglietto…

Condividi su:

• 
•