Candho zogaìmis s’arziu, di Luciano Carta

“Sos contos de Luciano Carta. Zogos.

Candho fimis minores, chie teniat dinari, o puru soddhos chi non curriant piusu, zogaiat a s’arziu. Sos ispiantados, chi fint sos pius po zogare poniant butònes de camisa, de carzones, de cappotto, e gai a sighire.
Si faghiat sa conta po ischire chie deppiat ’arziare po primmu. Su pius si zogaiat in duos. Sas monedas, in genere de chimbe francos, o sos soddhos de s’epoca fascista o de s’Ottighentos, si arziaiant in artu e candho ruiant a terra si deppiat biere si fint totu in “crastu” o in “rughe”. In genere su crastu fit s’ala de su ’inari cun sa conca de su re, (in sos soddhos d’epoca fascista, s’erma de Vittorio Emanuele III fit “crastu”, e s’ater’ala fit “rughe”). Candho sas figuras de sa moneda non fint ladinas, sos zogadores, primma de cominzare sa partida, si poniant de accordu e naraiant: custu est “crastu” e custu est “rughe”, riferindhesi a sas duas faccias de sa moneda.

Tandho su chi deppiat arziare si che serraiat sos soddhos in sa zunta de totas duas manos e, pinnigandhelas a crannuga po las ammeschiare bene, che las ’arziaiat in artu e s’ateru zogadore deppiat inzertare ite ruaint, nandhe: “crastu!” o puru: “rughe!”. Una ’orta ruttos a terra sos soddhos, s’abbaidaìat comente fint bessídos. Si essiant totos duos “crastu”, si s’arziadore aiat nadu “crastu”, los binchiat totos duos. Si invezes bessiant “rughe”, sa ’inchida toccaiat a chie aiat ’arziadu e sa posta si che la leaiat issu. S’atera ’arziada tocaiat sempre a chie aiat perdidu. Si però sos duos soddhos si poniant in terra unu cun “crastu” e s’ateru cun “rughe”, no aiat binchidu neunu, e s’arziadore deppiat torrare a barziare.

Su matessi fit po sos buttones, chi però fit pius fazile a istabilire su crastu e sa rughe, ca sa parte gobba de s’uttone fit “crastu”, e sa parte incavada fit “rughe”. Cuddhos chi non teniant né dinari né soddhos e fint sempre ispiantados che bagassa in chida santa, po poder zogare si ettaiant a sos butones e b’aiat borta chi che los istrazzaiant finzas dae sas bestes: dae sos cappottos birdes de sos babbos e dae sos cabbanos, chi sendhe mannos baliant a doppiu, dae sas zanchettas e puru dae sas camisas de domo.
Eo non fio meda fortunadu in custu zogu. B’aiat però chie fit abile e, mancari a imbrogliu, binchiant finzas chimbanta francos in d’una zogada. E tandho faghiant arrozzigare sos chi ch’aiant isculadu, ca los bidias intrandhe a su bar de Salvietti o de Baccareddhu e ndh’essiant cun d’unu gelato in manos, mancari de cussos in coppetta, cun sa palitteddha chi si che poniant a bucca, attaffiandhe cun gustu.
Sos isculados, po manigare su gelato, deppiant ispettare sa festa de Santu Bachis. A mala ozza!

Eo m’ammento chi m’aia fattu una bella collezione de soddhos cun Vittorio Galletta (sos bezzos nos aiant imparadu a narer de gai a Vittorio Emanuele III) e su fasciu in s’ater’ala, ma raramente appo zogadu a dinari ca propiu no ndhe tenìo. Poi m’ammento puru chi aía buscadu soddhos in colore de ottone de Vittorio Emanuele II e de Umberto I in domo de Nonnu meu, su Maggiore Corda, chi fit fizu de Zobantine, e cussos balìant assumancu 5 o 6 dinaris de Vittorio Galletta e de Mussolini. Su valore l’iscumbattaimis tra zogadores: su soddhu de re Vittorio Emanuele II baliat una deghina de soddhos de su fascismu. Custos bellos soddhos mannos los usaimis po “bàttere”, est a narrer chi l’arziaimis in artu dae sa pranta ’e manu dresta e intendhimis si su sonu chi faghiat ruindhe in sa manu. Si fit zoccu prenu, fit corpu ’onu, e faghimis barziare nandhe su versu chi aiat presentadu in pranta ’e manu su osddhu antigu; si nono torraimis a “bàttere” finzas chi su sonu non fit dèchidu e prenu.

E poi nachi sos pizzinnos non sunt dischentes de sas mazarzas!

Condividi su:

• 
•