Sa cariasa de Tiu Cuccuruddhù, de Luciano Carta

“Sos contos de Luciano Carta (in sa foto). Cun un d’una intrada: poite iscrimos in sardu? …. A iscrimos unu libberu de contigheddhos!

 

 

Primma ‘e totu nos dimandhaìmimis proite est dovere pro nois chi semus “istudiados” de iscriere in sa limba materna, mancari sas difficultades de s’iscrittura siant medas, ca non b’est s’abitudine e non b’est istadu mai s’istudiu. A che passara dae su faeddhu a s’iscrittura est guasi comente a che zumpare su mare!

E-i sa risposta chi nos amos dadu est custa: …..

 

 

 

 

 

 

 

 

“S’atera ‘orta appo iscrittu comente sunt naschidos custos contos. Cherzo però sighire a narer su chi nos naraìmis cun su s’amigu duttore Paulu Pireddu in sas chistionadas fitianas.

Primma ‘e totu nos dimandhaìmimis proite est dovere pro nois chi semus “istudiados” de iscriere in sa limba materna, mancari sas difficultades de s’iscrittura siant medas, ca non b’est s’abitudine e non b’est istadu mai s’istudiu. A che passara dae su faeddhu a s’iscrittura est guasi comente a che zumpare su mare!

E-i sa risposta chi nos amos dadu est custa:

Iscrimos in sardu

Nois duos [Paulu e deo] pensamos chi tutucantos deppìmos iscriere in sardu e abbell’abbellu amos a imparare a l’iscrier bene. Nara: non ch’amos passadu meda tempus de sa pizzinnia nostra istudiandhe sa grammatica italiana, latina, greca e franzesa? E proite non nos ant mai imparadu sa grammatica sarda? Pensamobèi. Chenza ndhe cherrer male a perunu de sos mastros e professores nostros, ca nos ant imparadu cosas meda e bonas, nos ant negadu però unu dirittu de natura: faeddhare e iscriere in sa limba materna”.

Mese pro mese Paulu at imparadu issu puru a iscriere bene su sardu e tandho l’at bènnidu unu disìzu, chi est in s’iscrittu chi sighit, inue so eo chi li rispndho: infattis issu cheriat regòllere sos contigheddos in d-unu libberu e bi creiat meda a custa cosa.

A iscrimos unu libberu de contigheddhos!

Mi naras de iscriere unu libberu con sos “contigheddhos de foghile” ch’iscrio donz’intantu, ammentandhe sos tempos de sa pizzinnia in sa iddha inue semus naschidos. T’app’a narrer chi b’appo pensadu medas bortas, ma non m’abbastat mai su tempus! So sempre impignadu a iscriere de ateras cosas. Però sa resone pius profundha est un’atera. Custas cosigheddhas nostras las iscrio solu po te, ca isco chi ti faghent piaghere e ti dant carchi minutu de ispelegu e no tenent atera pretesa. Las iscrio gai, candho rezzo su saludu de onzi die dae te, comente mi ’enint a conca. Non naschent dae su disinnu de faghere unu libberu. Si cheres però podimos faghere unu pattu: eo, candho so in vena, iscrio; tue, si ti ’enit sa gana e si lu cheres, copiachèlos in d’unu “file in word” e as a biere chi su libberu ndh’at a bessire abbell’abbellu, chenza però nos brivare de su gustu de su saludu fitianu. Gai su liberu l’iscrimos totos duos!”.

E isse aiat collìdu totu e de tant’in tatu mi los contaiat: sunt 80, sunt 100, sunt 120, e gai a sighire.

In ateras occasiones li aìo puru nadu chi non totu sos contos chi eo iscria fint fruttu se sa s’imbentu e de sa fantasia mia, ma eo medas contigheddhos los regollìa in biddha, dae pessones che mi los contaìant e calicunu s’est postu fintzas a los iscriere, mancari in d-un’iscrittura mezzàna, ma su documentu fit sempre interessante. Custa pessone, est zustu a lu narrere, si narat Carmelinu Chessa; sos ateros si narant Italo Bussa (es. sos contos de tiu Franzischeddhu), sas bonas anima de babbài Zommaria Sanna e de sig. Piero Porcu, grandhe contadore e barzellettyeri, e medas ateros. Ma ateros contos sunt sos chi appo intesu dae atera zente. Sunt contigheddhos collììdos in carrèla, sos chi si contaìnt paris cun sos bighìnos e cun sas bighìnas pro brulla, po si faghere una pastigheddha ‘ e risu ammentandhe sos difettos e sas cosas coriosas de carchi paesanu, su sero a denotte, friscurandhe.

Mi dimandho: tenet issos puru drittu de los contare, cun su gustu chi bi leaìmis sos seros in sa firscura e in dies de zerru, cun duas castanzas arrustu e carchi tazza de i’nu, a conc’a fogu o puru in sa chentina de carchi amigu ospitale cantandhe in Re?

Nerzat onzunu su chi pensat. A mie mi diat parrer chi ei.

 

1

Sa cariasa de Tiu Cuccuruddhù.

 

Fit su mese de maggiu e, in sos pagos possessos inue bi ndh’aiat, sa cariasa fit cominzandhe a abboniare. Tiu Cuccuruddhù bi ndhe teniat parizzas arbures in Orulèsu e isse si che pigaiat donzi die a si la tentare. Tandho sos cresurarzos andhaiant a fiottos a ischerfare in sas binzas e in sas iscras e sos meres depiant parare fronte, ca sinono de frutture non bi ndh’agattaiant, esseret figu, pessighe, pruna, aghina o pira. Sa cariasa poi fit fruttu ispeziale ca in biddha nostra bi ndh’aiat paga.
In cuss’annu s’annada prommittiat in bene: sas arbures fint meda ’arriadas. A sos primmos de lampadas cominzaiat a esser bona a boddhire e tiu Cuccuruddhù illonghiaìt sas oras de tentadura po salvare sa cariasa dae sos chi, a ora ’e mesudie o a s’iscurigada, candho sa zente dae sa campagna si che fit regorta, andhaiant a fagher visita a sa cosa anzena.

Tiu Cuccuruddhù s’aiat fattu su pinnettu e in nottes de luna fit finzas drommìdu inie.
Unu sero, a ora ’e sas noe, fit giai iscurigadu e sendhe s’aera annuada e chenza luna, non si bidiat a unu prammu dae su nasu. Cuddh’omine at pensadu:

«In nottes goi iscurosas sos canes de isterzu non s’attrivint a bessire a furare».

S’at postu sa bertula a coddhu e tuccadu si ch’est a biddha. Isse non si fit abbizzadu però chi b’aiat zente chi fit tentandhe a isse etotu paris cun sa cariasa …

Appenas chi at cunzadu sa zaga, unu fiottu de cresurarzos si che sunt bettados subra sas arbures da sa cariasa e, mancari a s’apparpidu, si ndhe sunt bene mascados.
Primma de si che fuire calicunu at pensadu de sezare una brulla a tiu Cuccuruddhù. Ant cambiadu zassu a su pinnettu!
S’incras manzanu, chitto chitto, tiu Cuccuruddhù si ch’est pigadu a su possessu po si tentare sa cariasa. Arrivadu a inue fit su pinnettu po che ponner sa bertula cun su recattu, at iscutinadu sa conca e meda meravizadu at nadu:

«Ohi òooh! Azzidente! Archibusada manna! Su pinnettu andhat menzus inue est como, che inue fit primma!».
E gai Tiu Cuccuruddhù, chi fit omine de ispiritu e ischiat finzas perdere, s’est consoladu de sa cariasa furada ammittindhe chi a sa fine fit cuntentu de su traballu fattu dae sos furancros. Su dannu de sa cariasa chi si ch’aiant manigadu, cussos cresurarzos de bonu coro bi l’aiant fattu in traballu!