It’est s’identitate turistica de sa Sardigna? de Bachis Bandinu

L’EDITORIALE DE SA CHIDA, de sa Fondatzione Sardinia.

It’est s’identitate turistica? Ponimus diversamente sa dimanda: ite damus in donu a sos turistas de s’identitate nostra? Comente nos presentamus pro dare testimonia de sas virtutes nostras? De sicuru, lis damus s’identitate de su mare, de su chelu e de sa terra: colores, formas, nuscos e sapores. Virtutes bunnantes. Est s’identitate de su zeniu de su locu, su genius loci sardu est de calitate pretziata e de incantu. Ma custu est unu donu de natura. Fachimus una dimanda traitora: cantos turistas dian benner in Sardigna si non b’esseret unu mare gai bellu? Duncas s’attrativa est in sa bellesa de su locu. E già custu nos ponet sa chistione de sa defensa de unu capitale chi non devimus perdere. Ma custu diat esser unu’arrejonu meta longu:

Torramus a sichire su filu de s’arrejonu, ponende una secunda dimanda: ite damus a sos turistas de s’identitate culturale sarda? Dande a sa paraula “cultura” su significatu de patrimoniu istoricu, archeolozicu, economicu, de traditziones populares, de modos de maniestare, de travagliare e affestare, de faeddare e de abitare sa terra nostra. A dolu mannu, damus pacu, ca nois matessi non bi credimus e non damus pretziu a sos benes nostros. A donzi modu, non resessimus a espricare comente meritan sas calitates identitarias de sa tzivilitate sarda. Unu bene no esistit si non si dat in visione e in assentu, e si non s’ischit presentare a sa zente. In pacas paraulas: unu deficit de comunicatzione.

Non resessimus a dare a sas domus de janas, a sos nuraches, a sos putzos sacros e tumbas de zigantes su valore chi, de fattu, ana in s’istoria europea. Pro narrere s’urtima: s’istoria italiana chi est essinde a puntatas incomintzat dae sos Etruscos, mancu mentovata s’istoria sarda, ci venit innantis e de importu prus mannu. Su nurache no est unu muntone de petra posta bene, su putzu sacru no est un’abbatorju ma un’opera de finesa e abilitate chi mancu oje diamus ischire fachere. Sos zigantes de Monte ‘e Prama antitzipan de chent’annos s’istatuaria greca. Cantu si valet sa mascara de Barbaria, su cantu singulare de su tenore, su ballu durdurinu de Oliana, sa gara poetica de versos leados a bolu? E mandicos, durches e vinos sardos? Si valen meta prus de su chi nois resessimus a ammustrare a sos istranzos, a su mundu.

Ite potimus narrere de s’architettura-urbanistica de su turismu sardu?

Vico Mossa at iscrittu meta supra s’identitate de sos modos de costruire in Sardigna, in prus s’identitate est in caminu e s’adattat a sos bisonzos novos, ma semper chene copiare modellos anzenos e chene abbrutire su zeniu de su locu. It’at de sardu unu villaggiu turisticu? Custu non cheret narrere a costruire villas a forma de nurache, poten essere costrutziones rivolutzionarias ma in su surcu de un’arte sarda: un’identitate de imbentare.

Abberu debile est s’identitate agro-alimentare sarda! S’ottanta pro chentu de sos produtos alimentares venin dae foras. Una seada potet essere de tricu americanu, de casu rumenu e de mele sudamericanu. Chissà da ube venit sa mendula de un’amaretto o de un’aranzada! Non pichemas s’arrejonu de sa fruttora.

In conclusione, una pulitica turistica devet mirare ad affortire s’identitate sarda a profettu de economia e de cultura.

Cagliari 28 luglio 2019

Bachis Bandinu