“Sos contos de Bacchisereddha: Bacchisereddha in pizzinnìa (3 fine) ”, de Luciano Carta.

Est su de tres  contos.  Po como est s’urtimu de Bacchisereddha. Luciano at a sighirire donzi sabodo cun atiros contos in limba.

 

3

Berbeghes e sozios

 

Sa pelèa de s’iscola dae s’atunzu e su ’eranu e de laghinzaresu dae lampadas a santuanini po Bacchisereddha est durada finzas a sa quinta elementare. Appustis leada sa Licenza elementare, su bellu deppiat ancora cominzare.

In su chimbant’unu su babbu teniat una chimbantina de ’erbèghes. S’est assoziadu cun ateros e po faghere un’ama de dughentas berbèghes b’at cherfidu sette “merigheddhos”, est a narrer battor sozios. Totu, comente podìant, tiraiana a campare, ca teniant famillia, e duos o tres cun fizos meda. A su babbu, chi fit su sotziu … pius mannu, li toccaiat a paschere s’ama una chida a su mese; sos ateros metade ’e chida a su mese. Meno male chi custa pelèa est durada solu un’annu. Bacchisereddha andhaiat cun su babbu a pizzinnu ’e robba una ‘orta a su mese po una chida intrea. Sos ateros puru teniant pizzinnos po sa robba, ma su pius chi b’agguantaiant fit una ‘orta solu, poi non bi torraiant piusu: fit una vida troppu fea po pizzinnos de doighi-treigh’annos! A sa fine est andhada a finire chi a Bacchisereddha l’est toccadu de los sostituire totucantos edd’est andhadu a laghinzaresu fittianu fintzas a Santu Zuanne, candho si torraiant a faghere sos cuntrattos de sotziu.

Oe non paret beru a lu contare: in mesu a tantos, b’aiat chie ti trattaiat bene e chie male. Su menzus fit tiu ‘Uanneddhu Putzone. Candho Bacchisereddha fit cun issu, in su bestiamine fit unu recrèu: arrustiat lardu e sartizza e poniat pane e casu bundhante; a bortas coghiat finzas sa pasta ponìndheche una labioleddha a caddhu de sa tripide in su pinnettu. Menzus de gai si moriat! Su peus fit tiu Trinzilleri: si manigaiat solu pretta, soru, latte e pane a medìda. Ma si podiat cumprendhere ca teniat fizos meda e fit finzas unu pagu mandroneddhu. Sos ateros, po contu ’e manigare, non b’aiat de si lamentare. Su pastore de famine no ndhe patit.

Tiu Metzànu faghiat su furbu e no andhaiat a azzuàre su pizzinnu mancu a ch’intrare sas berbeghes a su passiàle. Una chida at cominzadu a pròre meda e Bacchisereddha deppiat brincare su riu de Luanlècchere pro che accumpanzare s’ama a su cuile.. A forza de pelea, Bacchisereddha est resèssidu a che fagher brincare su riu a sas berbeghes: ndh’at tentu una e sas ateras bene o male ant postu fattu. Finida sa traversada, su laghinzaresu nostru fit trìcchia trìcchia e non zughiat mancu una trama assutta. Tiu Metzànu non s’est moidu mancu chi l’esserent isparadu a cannone e Bacchisereddha at arriscadu de che lu trazzare su riu. Metzànu est abbarradu bene apposentadu intro ’e su pinnettu, a car’a fogu, cun sa berritta e su cabbanu ’ettados, fumandhesi su toscaneddhu.

Regorta sa robba in su cuìle, Bacchisereddha si ch’at bogadu su cappotteddhu de furèsi; de cantu fit infustu, no abbarraiat ficcadu dae su pesu de s’abba. Tiu Metzànu sighiat a bistare sèzzidu a car’a fogu, tranquillu che paba. Po non s’infundhere, non che poniat mancu su nasu fora de s’intrada. Mancu a pissiare bessiat, ca po non s’infundhere pissiaiat dae sa zanna etotu!

Appustis chi Bacchisereddha si fit unu pagu assuttadu in su fogu, sa primma peraula chi l’at nadu tiu Metzànu est istada:

“A tempus meu, candho fio pizzinnu, che ‘ogaimis sas berbeghes a s’iscurigadorzu”.

Bacchisereddha l’at rispostu, arrennegadu:

“Bidindhe lu sezis cussu cappotteddhu de furesi postu a assuttare? Si ndhe nades un’atera, mi lu torro a bestire e lestru mi che tucco a car’a biddha!”.

Poi at sighidu:

“Bois, non de andhare a s’iscurigadorzu, mancu intro ’e die bi andhades cun sas berbeghes. Su pizzinnu comente un’ischiavu lu trattades!”

At rispostu tiu Metzànu:

“Non mi fettas cussa de ti che falare a biddha, sa ’irgonza!”.

Dae sa die tiu Metzànu est andhadu cun Bacchisereddha a l’azzuare a guvernare s’ama candho su tempus fit malu.

S’urtim’annu chi Bacchisereddha est andhadu a pastoreddhu teniat treigh’annos e sa die de Santu Zuanne s’at fattu su sinnu e at zurada a isse etotu:

“Mai pius a pizzinnu ’e robba!”.

Si ch’est bintradu a maniale de mastru ’e muru. S’isgobbaiat meda, ma assumancu su denotte drommiat in domo.

Gai est finida sa pizzinnia de Bachcisereddha. (FINE di tre puntate)