Is Sardos depeus gherrare totus unios po ndhe fàere cancellare e bogare sa Sardigna de cuss’elencu infame e arrefudare cun assoluta firmesa chi s’Itàlia cudennet is Sardos a unu destinu de “scarabei stercorari” po… nosi giare trabballu!

A una ingiustítzia infame s’Itàlia iat a aciúnghere una cretinada chi no istat ne in chelu, ne in terra e mancu in s’inferru: sinono, ite motivu est a ispainare e portare in giru in àteru logu puru is iscórias radiativas?

Ite giogu istúpidu est a giogare a “Chi le vuole?”? Dhue at pagu de isceberare: is iscórias dhas depent chistire inue dhas ant fatas, e no portare avatu de su logu a incuinare is àteros puru. Inue ant fatu is centrales atómica chistant is iscórias!

Noso no depeus acetare àteras vigliacadas e aprofitamentu de s’Itàlia. Chi dh’iscant bene totus is ingabbiaos in is partidos italianos, ca custa iat a èssere deabberu sa “finis Sardiniae”!

Po cussu, in riunione unitària de su Cussígiu e Giunta regionale, de totu is Síndhigos e de sa Cunferéntzia Episcopale Sarda si aprovet unu documentu chi pretendhat de ndhe bogare sa Sardigna de s’elencu de is sitos individuaos e in delegatzione andhent a Roma a significare a su Guvernu italianu in manera crara e decisa sa volontade de su Pópulu Sardu giai crara e decisa cun su referendum de su 2011.

Condividi su:

• 
•